Kosova

Sardi: Transformimi i FSK-së në Forca të Armatosura, i përgatitur dhe i koordinuar

Ministri i ministrisë për Forcën e Sigurisë së Kosovës (FSK), zotëri Haki Demolli priti në takim ambasadorin e Republikës së Italisë në Republikën e Kosovës, zotëri Piero Cristoforo Sardi, i shoqëruar nga atasheu i Mbrojtjes i akredituar për Kosovë, kolonel Franco Galletti.

Në takimin e përbashkët të ministrit Demolli dhe ambasadorit Sardi, u bisedua për marrëdhëniet e shkëlqyera ndërmjet Republikës së Kosovës dhe asaj të Italisë, për fushat e bashkëpunimit, për identifikimin dhe konkretizimin e aktiviteteve si dhe vazhdimin e bashkëpunimit edhe në të ardhmen.

Ministri Demolli, duke i uruar ambasadorit italian detyrën e re, i shprehu edhe besimin se bashkëpunimi me Ambasadën italiane do të vazhdojë dhe do të intensifikohet edhe më shumë në të ardhmen, dhe përmes saj edhe me shtetin, qeverinë, Ministrinë e Mbrojtjes dhe Forcat e Armatosura të Italisë.

Ministri Haki Demolli, u shpreh se ashtu si deri më tani edhe në të ardhmen, pret që shteti i Italisë të bëjë hapa përpara në drejtim të arritjes së marrëveshjes së bashkëpunimit në fushën e sigurisë ndërmjet dy vendeve, e gjithashtu edhe mbështetje për procesin e transformimit të FSK-së në Forca të Armatosura.

Ministri Demolli theksoi bashkëpunimin e mirë me KFOR-in, duke falënderuar në veçanti Kontingjentin italian në kuadër të Trupave Paqeruajtëse, për shërbimin në ruajtjen e paqes dhe stabilitetit në Kosovë.

Nga ana e tij, ambasadori i Italisë, zotëri Sardi u shpreh se Italia vazhdon ta sheh Republikën e Kosovës si faktor stabiliteti në regjion dhe se është e interesuar që ta mbështes në rrugën e saj të zhvillimit.

Më tej, për sa i përket transformimit të FSK-së në Forca të Armatosura, ambasadori Piero Cristoforo Sardi, tha se: ,,transformimi duhet të jetë i përgatitur dhe i koordinuar’’, duke përmendur këtu edhe nevojën e konsensusit të të gjitha partive politike në Kuvendin e Kosovës.

Kjo është vizita e parë e ambasadorit, Piero Cristoforo Sardi, në detyrën e re.

Komentoni