Lajme

Rrëfime se si Ahmet Krasniqi u njoh me shefin e Shtabit të Krizave në Kroaci

Drazhen Jurkoviq, ka treguar në një intervistë ekskluzive për “Interaktiv” të KTV-së se si e kishte njohur kolonelin Ahmet Krasniqi, ish-ministër i Mbrojtjes në Qeverinë e Kosovës në Ekzil.

Jurkoviq thotë se Krasniqi kishte simpati për Kroacinë dhe popullin kroat, transmeton Koha.net.

“Unë kam jetuar në qytetin ku Ahmet Krasniqi jetonte po ashtu. Para luftës ai ishte kolonel i armatës Jugosllave në qytetin Gospiq, qytet ky ku unë u linda e jetova dhe atë e takova rreth viteve të 80-a. Ne njihnim familjen e tij dhe takoheshim shpesh dhe kur filloi koha e trazuar në Kroaci nga fundi i viteve të 80-a fillimi i të 90-ave, ne kemi intensifikuar takimet tona. Ahmet Krasniqi kishte simpati për Kroacinë e popullin e saj si oficer i Armatës Jugosllave, natyrisht ndjente përkatësi për shqiptarët për krijimin e shtetit dhe idesë së shtetit, por marrë parasysh se unë në atë kohë punoja si mjek i ri në Zagreb, fati deshi që në atë kohë shoqëroheshim dhe unë u angazhova në qytetin tim në Kroaci në atë periudhë para e gjatë luftës dhe kështu filluam të bashkëpunonim meqë atë kohë ai ishte komandant në një kazermë shumë strategjike”, rrëfen Jurkoviq, duke shtuar se Krasniqi ishte zëvendëskomandant në Gospiq.

Për ushtarakun kroat, Krasniqi ndihmoi shumë popullit kroat dhe vullnetarëve 
kroat që të arrihet deri tek armët dhe të mbrohet Gospiqi, qytet në mes të Kroacisë.

Bashkë me Krasniqin, Jurkoviq përmend edhe ushtarkët tjerë shqiptarë në Kroaci.

“Ata kanë dhënë kontribut të madh. Duhet përmendur edhe Agim Çekun, ish-kryeministrin tuaj pastaj edhe Rahim Ademin, që edhe sot jeton në Kroaci, dhe një mori shqiptarësh që jetonin në qytetin tim”, shtoi ai.

Leni koment

Email-i juaj nuk do te publikohet.


*