Kosova

Rrahja në UP, rektori largon përkohësisht nga puna dy profesorët

Rektori i Universitetit të Prishtinës “Hasan Prishtina”, Marjan Dema lidhur me incidentin fizik ndodhur dje në Fakultetin e Arteve të Bukura të Universitetit të Prishtinës, mori vendim për largim të përkohshëm nga puna të të dy profesorëve të përfshirë në incident.

Prof. Asoc. Mehmet Behlulit iu shqiptua masa e largim i përkohshëm nga puna deri në marrjen e vendimit përfundimtar nga organi kompetent i punëdhënësit. Ndërkaq, Prof. Asoc. Alban Nimanit, iu shqiptua po ashtu e njëjta masë, por ky i fundit ditën që ndodhi incidenti ka ofruar dorëheqje të parevokueshme nga pozita e tij.

Vendimi është marrë duke u bazuar në nenin 28 të Statutit të Universitetit të Prishtinës, nenin 73, paragrafin 1.3, nenin 74 dhe 75 të Ligjit të Punës në fuqi, si dhe për shkak të uljes së prestigjit të Universitetin të Prishtinës “Hasan Prishtina”.

Përndryshe, në Fakultetin e Arteve të Universitetit të Prishtinës, paraditen e së enjtes ka ndodhur një incident.

Profesori Alban Nimani po pretendon që është sulmuar nga kolegu i tij Mehmet Behluli.

E pikërisht këtë akuzë ka edhe Behluli për të duke thënë se Nimani veçse njihet si një person që i ka sjellë telashe fakultetit.

Të dy palët pretendojnë që kanë dëshmitarë që tregojnë se kush e sulmoi kë.

Këtë rast Nimani e ka paraqitur edhe në polici.

Komentoni