Lajme

Çmimet e biletave të aeroplanit bien, në Prishtinë dhe Tiranë rriten

Tarifa fluturimesh kaq të lira brenda BE-së nuk janë parë ndonjëherë, shkruan Corriere Della Sera. Me 300 euro mund të udhëtohet vajte/ardhje në Azi. Brexit dhe terrorizmi kanë trembur pasagjerët, ndërsa mes shoqërive ajrore ka nisur ‘lufta’.

Deri ku mund të ulet çmimi i një bilete fluturimi? Në gusht, mund të gjesh pa frikë bileta fluturimesh për udhëtime mes kryeqyteteve të Bashkimit Europian me 3.8 euro vajte/ardhje, përfshirë dhe taksat. Në shtator – tetor për disa fluturime me destinacion Lindjen e Mesme biletat mund të prenotohen me një çmim që shkon deri në 340 euro, përfshirë të gjitha taksat.

Me 160 euro mund të udhëtoni nga Milano në San Françisko për disa ditë mes shtatorit dhe nëntorit. Sipas Hopper, kompani e cila studion ecurinë e çmimeve, në datë 16 korrik fluturimi SHBA – Europë preku vlerën më të ulët të mundshme në tre vitet e fundit, 560 euro.

Rekordi i uljeve

Rënia e çmimeve ishte e parashikuar. Rritja e fortë e numrit të pasagjerëve, kryesisht nga Azia, ka bërë që shoqëritë ajrore të vënë në dispozicion më shumë vende të lira. Për këtë mjafton që të analizohen parashikimet e Iata-s, shoqatës ndërkombëtare të aviacionit civil e cila përfaqëson rreth 80% të shoqërive ajrore. “Në vitin 2016, mesatarja botërore e çmimit të një bilete vajtje/ ardhje do të zbresë në kuotën 366 dollari (333 euro), 106 dollarë më pak se në vitin 2014 dhe rreth 62% më pak se në vitin 1995”.

Paralelisht numri i pasagjerëve do të rritet nga 3.6 në 3.8 miliardë në vit.

Pasagjerët që mungojnë

Por, pastaj mbërriti Brexit, vendimi i Mbretërisë së Bashkuar, një nga tregjet më të rëndësishme për shoqëritë ajrore, për të lënë Bashkimin Europian. Më pas sulmet terroriste në Stamboll e Nice. Këtyre iu shtua edhe grushti i dështuar i shtetit në Turqi.

Rezultati? Pasagjerët, në veçanti ata aziatikë, më të ndjeshmit ndaj pasigurive sociale dhe politike, reduktuan prenotimet. Me dhjetëra shoqëri, përfshirë këtu ndikimet nga lëvizjet e atyre me kosto të ulët, u gjendën përballë vendeve bosh dhe si përgjigje ulën ndjeshëm çmimet e biletave.

Një luftë që dikton ulje të mëtejshme, por që përballë ka shoqëritë e tjera ( jo ato me kosto të ulët).

Ryanair, për shembull për të mbajtur të lartë normën e mbushjes së avionëve, do të ulë me 12% koston e biletave. Kompania parashikon që gjatë periudhës prill 2016 – mars 2017 të sigurojë 117 milionë pasagjerë. Biletat që ka ofruar kjo kompani në periudhën prill – qershor 2016 arritën një mesatare prej 39,9 euro ose rreth 10% më pak se në të njëjtin tremujorit të vitit të kaluar.

Parashikimi për 2017-ën

Çfarë do të ndodh në muajt në vazhdim? Çmimet, thonë analistët, do të vazhdojnë të bien deri në dhjetor. Por, më pas shoqëritë që do të duan të transportojnë më shumë pasagjerë, duke paguar më shumë do të nxjerrin në pah planet “mbrojtëse” : ulje të numrit të destinacioneve, reduktim i vendeve në dispozicion veçanërisht për pasagjerët e distancave të gjatë, për të rritur kështu çmimin e biletave. Dilema më e madhe e administratorëve të shoqërive ajrore është se si do të reagojnë konsumatorët.

Sepse pasi kanë provuar që të udhëtojnë me 4 euro nga njëri kryeqytet i Europës në tjetrin do të jetë e vështirë që të kalohet në një çmim dhjetëfish më të lartë në më pak se një vit, përfundon artikulli i Corriere della Sera.

Vetëm Shqipëria dhe Kosova me çmime të çmendura

Ndryshe nga tendenca europiane, në Shqipëri dhe Kosove çmimet janë rritur ndjeshëm muajt e fundit. Kryesisht për sezonin e verës, kur mergimtaret vine nga diaspora. Pervec cmimeve te shtrenjta, është pothuajse e pamundur te gjesh edhe vende te lira, sikur te mos i rezervoje me kohe. 

Edhe në raport me rajonin, biletat nga Tirana dhe Prishtina janë disafish më të shtrenjta. Nga Shqipëria drejt Europës, biletat janë minimalisht 50% më të shtrenjta, edhe kur bëhet fjalë për të njëjtët operatorë, p.sh. me Austrian Airlines.

Sidomos në Maqedoni, biletat janë të lira për disa arsye. Në të ka operatorë low cost si Wizz Air; shteti subvencionon kompanitë; dhe taksat aeroportuale janë më të lira se në Shqipëri. 

Nga Shkupi për në Milano gjen bileta vajtje-ardhje me 65 euro, nga Tirana minimumi është 170-270 euro. Londra është e arritshme me 170-180 euro nga Shkupi dhe Tivari, nga Tirana  dhe Prishtina mbi 400-500 euro.

Në Podgoricë veprojnë dy operatorët low cost, Ryan Air dhe Easy Jet, nga të cilët mund të gjesh alternativa të lira, sidomos për kthimin nga Londra (më pak se 50 euro)./monitor/rtklive/

Leave a comment

Your email address will not be published.


*